Orthodoxe Kirchen

Die Orthodoxi Chille (altgr. ὀρθός orthos, ,richdig, gradlinig‘ und δόξα doxa, ,Vereerig, Glaube‘; also ,die richdigi Vereerig oder rächti Leer vo Gott‘, im Slawischen pravoslavnaja cerkov (православная церковь)) nenne sich die christlige Chille vom byzantinische Ritus. Si bestoot us meerere sälbstverwaltete Chillene, wo alli iiri geografische, nazionaale und kulturelle Äigenarte häi, aber theologisch veräint si. Die Aaghöörige vo de orthodoxe Chille verstöön sich as Äinhäit und reede dorum mäistens vo dr Chille vo dr Orthodoxii im Singular. Die orthodoxe Chille häi öbbe 300 Millioone Aaghöörigi und si die drittgrössti christligi Gmäinschaft uf dr Wält.

Vo iine muess mä die sogenannte Altorientalische Chille underschäide. Aber mä bezäichnet sä zämme mit de orthodoxe Chille, wo im hellenistischi Kulturruum entstande oder vo dört us gründet worde si, und de unierte Chille mit östlige Rite, wo Däil vo dr Römisch-katholische Chille si, vilmol as Ostchille. Dr Begriff Ostchille isch dorum äifach e geografische Sammelbegriff, und stoot nit für e Grubbe vo Chillene, wo as Äihäit verstande wärde. Es git fundamentali Underschiid zwüschene, zum Bischbil git s käi Moolgmäinschaft vo de orthodoxe Chille und de unierte Chille.